پنوعاقل (رپورٽ: نديم بوزدار) پنوعاقل ويجهو رولو ڪتن نينگر کي ڏاڙهي ماري ڇڏيو، گهر ۾ ڪهرام، خبر موجب رضا ڳوٺ ٿاڻي جي حد ڳوٺ يوسف جوڳي ۾ رولو ڪتن جي لوڌ 10 ورهين جي آصف پٽ ممتاز جوڳي کي جسم جي مختلف حصن ۾ چڪ هڻي سخت زخمي ڪري ڇڏيو
زخمي نينگر کي تعلقي اسپتال پنوعاقل منتقل ڪيو ويو، جتان حالت نازڪ هئڻ ڪري کيس سکر سول اسپتال ريفر ڪيو ويو، جتي هو زخمن جا سور نه سهندي دم ڏئي ڇڏيو
نينگر جو لاش ضروري ڪارروائي بعد وارٿن حوالي ڪيو ويو، معصوم نينگر جو لاش گھر پھچڻ تي ڪھرام مچي ويو، وارثن ٻڌايو ته رستي کان گذرندي رولو ڪتن نينگر تي حملو ڪري کيس ڏاڙهي سخت زخمي ڪري ڇڏيو، جنهن کي اسپتال نيو ويو پر هو بچي نه سگهيو
نئين ديري ۾ ڪتي ڏاڙهيل نينگر فوت، وارثن پاران مدي خارج ويڪسين لڳائڻ جو الزام
نئون ديرو(رپورٽ: نور محمد سومرو) نئون ديرو ڀرسان ڳوٺ سانول جروار ۾ ڪتي ڏاڙهيل نائين ڪلاس جو شاگرد 15 ورهين جو صدام جروار فوت ٿي ويو، چاچي ساجد جروار پنهنجي اخبار کي ٻڌايو ته صدام کي 29 مارچ تي ڪتي ڏاڙهي زخمي ڪري وڌو هو، جنهن کي ڳڙهي خدابخش ڀٽو اسپتال بعد لاڙڪاڻي کڻي وياسين جتي کسي ويڪسين لڳائي وئي هئي
هن الزام هڻندي چيو ته صدام کي ڪتي جي چڪ کان بچاءُ واري لڳايل ويڪسين مدي خارج هئي يا بي اثر ان جو هائڊرو فوبيا وائرس تي اثر نه ٿيو ۽ صدام جسم ۾ هائڊرو فوبيا جو وائرس وڌڻ ڪري فوت ٿي ويو. هن صحت کاتي جي اعليٰ اختيارين کي اپيل ڪئي ته نوٽيس وٺي شفاف جاچ ڪرائي وڃي
