ڪراچي (ويب ڊيسڪ) اسرائيل پاران غزه جي پناهگير ڪيمپ تي بمباري ۾ 50 کان وڌيڪ فلسطيني شهيد ٿي ويا، اسڪولن، مسجدن ۽ اسپتالن تي بمباري ۾ وڌيڪ درجنين فلسطيني شهيد ٿي ويا، ٻارن ۽ عورتن سميت سوين زخمي ٿي پيا
اسرائيلي فوج جي وحشياڻين ڪارروائين ۽ آمريڪي صدر جو بائڊن جي پاليسي خلاف واشنگٽن ۾ تاريخي احتجاج ڪيو ويو، آمريڪا جي هڪ لک کان وڌيڪ شهرين پاران وائيٽ هائوس تائين ريلي ڪڍي وئي
مظاهرين چيو ته غزه ۾ معصوم فلسطيني ٻارن جي قتلام تي خاموش نه ويهنداسين، اسرائيل جي حمايت ڪندڙ آمريڪي صدر جو بائڊن جا هٿ به فلسطينين جي خون سان رنگيل آهن، صدر جوبائڊن کي لڪڻ نه ڏينداسين
لنڊن جي ٽرافلگر اسڪوائر تي به اسرائيل خلاف تاريخي احتجاج ڪيو ويو، غزه ۾ فلسطينين تي اسرائيلي بمباري فوري طور بند ڪرائڻ جو مطالبو ڪيو ويو
اسرائيلي وزير پنهنجي بيان تان هٿ کڻي ويو
غزه تي ايٽم بم ڪيرائڻ جي ڌمڪي ڏيندڙ اسرائيلي وزير پنهنجي بيان تان هٿ کڻي ويو، اسرائيلي وزير اميڪائي الياهو چيو هو ته غزه تي ايٽم بم ڪيرائڻ جو امڪان رد نه ٿو ڪري سگهجي
اسرائيلي وزير هڪ انٽرويو دوران فلسطينين کي آئرلينڊ يا ڪنهن ريگستان ڏانهن نڪري وڃڻ جو مشورو به ڏنو هو
انتهاپسند وزير جي بيان سبب اسرائيلي حڪومت به سخت پريشان هئي، اسرائيلي وزيراعظم نيتن ياهو انتهاپسند ميمبر جي ڪابينا اجلاسن ۾ داخلا روڪي ڇڏي
سڄي دنيا ۾ سخت تنقيد بعد اسرائيلي وزير بيان تان هٿ کڻي ويو، اميڪائي الياهو چيو آهي ته ايٽم بم جو لفظ اصطلاح طور استعمال ڪيو هو
