ڀارت کي فائنل ۾ پهرين شڪست، آسٽريليا ڇهون ڀيرو ڪرڪيٽ چيمپئن بڻجي ويو

احمد آباد (م ڊ)ڀارت کي 6 وڪيٽن تان شڪست ڏئي آسٽريليا ڇهون ڀيرو عالمي چيمپئن بڻجي ويو، احمد آباد جي نريندر مودي ڪرڪيٽ اسٽيڊيم ۾ کيڏيل آءِ سي سي ورلڊ ڪپ 2023ع جي فائنل ۾ ڀارت جو 241 رنز جو هدف آسٽريليا 43هين اوور ۾ 4 وڪيٽن جي نقصان تي حاصل ڪري ورتو

آسٽريليا ڪرڪيٽ ورلڊ ڪپ جي تاريخ ۾ سڀ کان وڌيڪ ڇهه ڀيرا چيمپئن بڻجندڙ ٽيم بڻجي وئي آهي، جيڪا هن کان اڳ 1987، 1999، 2003، 2007 ۽ 2015 ۾ به ٽائيٽل پنهنجي نالي ڪري چڪي آهي، پهرين کيڏندي ڀارت جي ٽيم 240 رنز ٺاهي آل آئوٽ ٿي وئي، ڪي ايل راهول 67، ويرات ڪوهلي 54 ۽ روهت شرما 47 رنز ٺاهي نمايان رهيا، آسٽريليا طرفان مچل اسٽارڪ 3، پيٽ ڪمنز ۽ جوش هيزل ووڊ 2، 2 وڪيٽون ورتيون

جواب ۾ آسٽريليا هدف 43هين اوور ۾ 4 وڪيٽن جي نقصان تي حاصل ڪري ورتو، ٽريوس هيڊ 120 بالن تي 137 رنز جي اننگ کيڏي، جڏهن ته مارنوس لبوشين 48 رنز ٺاهيون، ڀارت طرفان جسپريت بمرا 2، جڏهن ته محمد شامي ۽ محمد سراج هڪ هڪ وڪيٽ ورتي، اهڙيءَ ريت ورلڊ ڪپ ۾ ناقابل شڪست رهندڙ ڀارتي ٽيم فائنل ۾ هارائي وئي

ڀارتي وزيراعظم نريندر مودي آسٽريليا جي ٽيم کي چيمپئن ٿيڻ جي ٽرافي ڏني. ان موقعي تي آسٽريليا جو نائب وزيراعظم پڻ موجود هو

 آءِ سي سي ورلڊ ڪپ 2023ع ۾ پليئر آف دي ٽورنامينٽ ويرات ڪوهلي کي قرار ڏنو ويو، جنهن 11 ميچز ۾ 6 ففٽيز ۽ 3 سينچريز جي مدد سان 765 رنز اسڪور ڪيون

سڀ کان وڌيڪ وڪيٽون وٺندڙ بالر ڀارت جو محمد شامي رهيو، جنهن 11 ميچز ۾ 24 وڪيٽون ورتيون، جڏهن ته بيسٽ فگرز جو ايوارڊ پڻ محمد شامي جي نالي رهيو، جنهن هڪ ميچ ۾ 57 رنز ڏئي 7 وڪيٽون حاصل ڪيون

ٻئي پاسي آسٽريليا جي ڪاميابي تي آسٽريليا ۾ جشن ملهايو ويو، جڏهن ته انڊيا ۾ سوڳ واري صورتحال آهي، گرائونڊ ۾ موجود انوڪشا شرما به روئي ڏنو

Disappointed Anushka Sharma today India vs AUSTRALIA #INDvsAUSfinal #IrfanPathan #congratulationinda pic.twitter.com/Xy7O5ZLExe

— The F…KING (@RaymondHaris2) November 19, 2023

ٽورنامينٽ ۾ سڀ کان گهڻا ڇڪا هڻڻ جو اعزاز ڀارتي ڪپتان روهت شرما 31 ڇڪا هڻي حاصل ڪيو، جڏهن ته هڪ اننگ ۾ سڀ کان وڌيڪ رنز ٺاهڻ جو اعزاز آسٽريلوي گلين ميڪسويل جي نالي رهيو، جنهن افغانستان خلاف 201 رنز جي اننگ کيڏي