ڪراچي(رپورٽ: حبيب جمالي) وفاقي تحقيقاتي اداري ايف آءِ اي ڪراچي ايئر پورٽ تي وڏي ڪارروائي ڪندي اسرائيل ۾ غيرقانوني نوڪري ڪندڙ ميرپور خاص واسي 5 ڄڻن کي گرفتار ڪري ورتو آهي
ايف آءِ اي ترجمان جو ان سلسلي ۾ چوڻ آهي ته ايف آءِ اي ڪرائيم سرڪل ميرپورخاص جي هڪ ٽيم ڳجهي اطلاع تي ڪراچي ايئرپورٽ تي ڪارروائي ڪندي موجب نعمان صديقي، ڪامل انور، ڪامران صديقي، محمد ذيشان ۽ محمد انور کي گرفتار ڪري ورتو
گرفتار ڪيل جوابدارن جو تعلق ميرپورخاص سان آهي جوابدار اسرائيل جي شهر تل ابيب ۾ هيلپر ۽ ڪار ڌوئڻ طور نوڪري ڪندا هئا ۽ 4 کان 7 سالن تائين تل ابيب ۾ رهيل هئا انهن اسرائيلي ايجنٽ ذريعي تل ابيب ۾ غيرقانوني طور پهچي رهائش اختيار ڪئي ۽ ايجنٽ کي في شخص 3 کان 4 لک رپيا ڏنا هئا
ترجمان جو چوڻ هو ته جوابدار شينگن ويزا تي جارڊن ايئرپورٽ کان اسرائيل داخل ٿيا هئا ۽ ويسٽرن يونين ذريعي پاڪستان رقم اماڻيندا هئا، جوابدار ترڪي، ڪينيا ۽ سريلنڪا واري رستي کان به جارڊن ايئرپورٽ پهچي اسرائيل ۾ داخل ٿيندا رهيا آهن
ايف آءِ اي موجب جوابدار وطن واپسي لاءِ دبئي واري رستي جارڊن ايئرپورٽ کان ڪراچي پهتا هئا ته کين گرفتار ڪري ورتو، پاسپورٽ قانون ۽ اميگريشن آرڊينينس تحت 8 ڄڻن خلاف ڪيس داخل ڪيو ويو آهي جڏهن ته ٽن ڄڻن جي گرفتاري لاءِ ڇاپا هنيا پيا وڃن
هي به پڙهندا