اسلام آباد (ويب ڊيسڪ) صحافي تنظيمن پريونشن آف اليڪٽرانڪ ڪرائمز ايڪٽ (پيڪا) ترميمي آرڊيننس کي اسلام آباد هاءِ ڪورٽ ۾ چئلينج ڪري ڇڏيو. پي بي اي، اي پي اين ايس، سي پي اين اي ۽ ايمينڊ ڏيل طور تي درخواست داخل ڪئي آهي.سينيئر وڪيل منير اي ملڪ طرفان داخل ڪرايل درخواست ۾ صحافي تنظيمن پيڪا ترميمي آرڊيننس کي چئلينج ڪيو آهي، جنهن ۾ وفاقي ڪابينا، سيڪريٽريٽ، اطلاعات واري وزارت، آءِ ٽي ۽ قانون واري وزارت کي ڌر بڻايو ويو آهي.درخواست ۾ موقف اختيار ڪيو ويو ته آرڊيننس جا سيڪشن 2 ۽ 3 عوام جي ڄاڻ واري حق جي ڀڃڪڙي آهي
ترميم ٿيل آرڊيننس آئين جي آرٽيڪل 19 اي ۾ ڏنل بنيادي حقن جي ڀڃڪڙي آهي. درخواست ۾ چيو ويو آهي ته 18 فيبروري 2022 تي صدر پيڪا ايڪٽ ۾ ترميم جو آرڊيننس جاري ڪيو، جيڪو بنيادي حقن ۽ آئين جي ڪيترن ئي آرٽيڪلز جي ڀڃڪڙي آهي، جيڪو سيلف سينسرشپ کي فروغ ڏيندو، صدر وٽ مناسب جواز هجڻ ضروري آهي. درخواست ۾ ان آرڊيننس کي ڪالعدم قرار ڏيڻ جي استدعا ڪئي وئي آهي.