ڪراچي: ملڪ جي مختلف شهرن ۾ مذهبي تنظيم پاران احتجاج ۽ ڌرڻا جاري آهن. لاهور ۾ ڪيترن ئي هنڌن تي احتجاج سبب ٽريفڪ بند ٿي وئي جڏهن ته پوليس مظاهرين کي منتشر ڪرڻ لاءِ چوڪ يتيم خاني ۾ شيلنگ ڪئي. لاهور ۾ سگيان پل ، شاهدره ۽ فيروزپور روڊ تي شنگھائي برج جي ويجهو پڻ ٽريفڪ بند ڪئي وئي آهي. ملتان ۾ ، بهاولپور بائي پاس چوڪ تي احتجاج سبب ٽريفڪ جام ٿي وئي ۽ گاڏين جون قطارون لڳي ويون. عوام احتجاج جي ڪري سخت پريشاني کي منهن ڏئي رهيا آهن. ڪيتريون ئي ايمبولينسون پڻ ٽريفڪ جام ۾ ڦاسي پيون.
ڪراچي جي صورتحال
ٻئي طرف اورنگي ٽائون نمبر 4 ۽ بلديا نمبر 4 ، حب ريور روڊ ، لياقت آباد ، ڪورنگي ۾ ٽريفڪ جي رواني پڻ متاثر ٿي آهي. آءِ آءِ چندريگر روڊ ، ايم اي جناح روڊ سميت ڪيترائي روڊ بلاڪ آهن، جنهن ڪري عوام سخت پريشان آهن ۽ ٽاور کان گورنر هائوس تائين گاڏين جون ڊگهيون قطارون لڳي ويون آهن. اسٽار گيٽ تي ٽرئفڪ جو وهڪرو پڻ متاثر ٿيو آهي ، جڏهن ته مختلف شاهراهن تي احتجاج ۽ ٽرئفڪ جام مسافرن لاءِ ڏکيائين جو سبب بڻيل آهن.
