اسلام آباد (بيورو رپورٽ) سپريم ڪورٽ ۾ صدارتي ريفرنس جي ٻڌڻي دوران عدالت پڇاڻو ڪيو ته ڇا هڪ شخص کي تاحيات نااهل ڪرڻ لاءِ ڦري وڃڻ جو بنياد ڪافي آهي
سپريم ڪورٽ ۾ چيف جسٽس پاڪستان جي سربراهي ۾ 5 رڪني لارجر بينچ آرٽيڪل 63 اي جي تشريح بابت صدارتي ريفرنس جي ٻڌڻي ڪئي جنهن ۾ اٽارني جنرل عدالت ۾ پيش ٿيو
ٻڌڻي جي شروعات تي چيف جسٽس آف پاڪستان چيو ته اڄ اٽارني جنرل کان سوال نه ٿيندو، هو پنهنجا دليل مڪمل ڪري
ٻڌڻي دوران اٽارني جنرل عدالت کي ٻڌايو ته هن وزيراعظم سان عدالتي سوالن تي ڳالهه ٻولهه ڪئي، وزيراعظم ذريعي عدالت ۾ بيان ڏيڻ چاهيان ٿو، هو ججن جي غير جانبداري ۽ عدليه جي آزادي تي يقين رکن ٿا، هن ڪماليا جلسي ۾ 1997ع ۾ ججن کي ملائڻ جي ڳالهه ڪئي هئي، هو ججز جي غير جانبداري ۽ عدالت جي آزادي تي يقين رکن ٿا
دليل ڏيندي اٽارني جنرل چيو ته جيڪڏهن اسيمبلي ٽوڙي وڃي ته پوءِ ڪو به ميمبر پنهنجي رڪنيت جي دعويٰ نٿو ڪري سگهي، ڦري ويل ميمبرن لاءِ آئين ۾ چيو ويو آهي ته هو ميمبر نه هوندا ۽ سيٽ خالي سمجهي ويندي، سيٽ خالي هجڻ جو مقصد ٻيهر چونڊ ٿيندي
اٽارني جنرل جي دليلن تي جسٽس منيب اختر پڇاڻو ڪيو ته ڪنهن به ميمبر کي ڪهڙن بنيادن تي نااهل ڪيو وڃي؟ پارليامينٽ نااهلي جي مدت 2 يا 5 سالن تائين مقرر ڪري سگهي ٿي، جڏهن ته جسٽس اعجاز الاحسن رمارڪس ڏنا ته پارليامينٽ 62 اي ۾ ترميم ڪري نااهلي جي مدت ڇو مقرر نه ڪري رهي آهي؟
ان موقعي تي چيف جسٽس آف پاڪستان چيو ته جيڪڏهن ڦرڻ کي تمام خراب عمل سمجهيو وڃي ته ان جي سزا نااهلي هجڻ گهرجي، اسان قانون ساز نه آهيون، رڳو قانون جي تشريح ڪري سگهون ٿا، آئين کي ٻيهر نه ٿا لکي سگهون، ڇا هي بحث آئين ٺاهڻ وارن جي نيت ڄاڻي سگهي ٿي, جنهن بعد عدالت وڌيڪ ٻڌڻي سڀاڻي تائين ملتوي ڪري ڇڏي
ھي به پڙھندا
ق ليگ جي حڪومت جو ساٿ ڏيڻ ۾ مونس الاهي جو ڪردار هو: راڻا ثناءُ الله
