ٺٽو(رپورٽ : اسماعيل ميمڻ) جسقم چيئرمين صنعان خان قريشي چيو آهي ته سنڌ کي ڪيڪ سمجهي ڪاٽي سنڌ جي قيمتي زمينن تي والار ڪئي پئي وڃي، سامونڊي ۽ ڪوهستاني زمينون لينڊ مافيا هٿان والارجي رهيون آھن، سامونڊي ٻيٽن، درياءَ ۽ سنڌ جي وسيلن، جبلن ۽ معدنيات تي قبضو ڪيو ويو آھي ۽ ڌارين کي آباد ڪرائي ڌرتي ڌڻين کي اقليت ۾ تبديل ڪيو پيو وڃي ٺٽي ۾ جسقم پاران سنڌ جي زمينن تي والار، سمنڊ ٻيٽن درياءُ ۽ وسيلن تي قبضي ۽ منشيات جي وڪري خلاف ايڌي سينٽر ٺٽو کان جسقم جي سوين ڪارڪنن ۽ اڳواڻن جي اڳواڻي ۾ ٺٽي جي مين رڪشا اسٽاپ تي پهچي قومي شاهراھ تي ڌرڻي جي صورت اختيار ڪندڙ احتجاجي ريلي کي خطاب ڪندي جسقم چيئرمين صنعان قريشي چيو ته هٿ وٺي سڄي سنڌ ۾ منشيات کي عام ڪري نوجوان نسل کي تباھ ڪيو پيو وڃي، جيڪو هڪ قومي الميو آھي. ھن چيو ته سنڌ جي بنيادي حقن جي حاصلات زمينن تي والار منشيات جي ڪاروبار پاڻي تي ڌاڙي توڙي تڪراري منصوبن کي فوري طور بند ڪرائڻ جي گُھر ڪندي اعلان ڪيو آھي ته جسقم پاران سنڌ سان ٿيندڙ ناانصافين خلاف مرحليوار تحريڪ جاري رکي ويندي، ھٿ وٺي ڌارين کي ڌرتي تي قابض ڪيو پيو وڃي سنڌ جي وسيلن تي ڌارين جو قبضو ڪرائڻ سان گڏ نوجوانن کي نشي جو عادي بنائڻ لاءِ کلي عام منشيات جو وڪرو جاري آھي چند قبضا گير ۽ منشيات فروش رياست کان طاقتور ناھي پر رياست ھٿ وٺي سنڌ کي تباھ ڪري رھي آھي اقتدار جا شوقين سنڌ جي وسيلن ۽ نوجوانن جي موت جي پرواني تي راضي ٿي ويا آھن انھن کي سنڌ ۽ سنڌ جي نوجوانن کان وڌيڪ اقتدار آھي پر اسان کين سنڌ تي قبضو ڪرڻ نه ڏينداسين. ھن چيو ته سنڌ ۾ مسڪين ماڻھن لاءِ صحت جون سھولتون ناھين، تعليمي نظام تباھ پرائيوٽ اسپتالن ۽ اسڪول کي ھٿي ڏيئي ڪاروبار ڪيو پيو وڃي، قدرتي وسيلن سان مالا مال سنڌ جي عوام کي پنڻ تي مجبور ڪيو ويو آھي، معصوم ٻارڙا چوڪن تي خيراتون پيا گھرن ۽ سنڌ جي وسيلن تي ڌارين کي عياشيون ڪرايون پيون وڃن، جسقم ھن صورتحال ۾ پنھنجي ماڻھن کي اڪيلو ڪو نه ڇڏيندي، اسان جي جھدوجھد اقتدار لاءِ نه سنڌ لاءِ آهي، اسان لاءِ اول ۽ آخر صرف سنڌ آھي، علمي، ادبي ۽ تاريخي شھر ٺٽو کي چورن، لوفرن، ڪرپٽ ڪامورن ۽ منشيات فروشن جي رحم ڪرم تي ڇڏيو ويو آھي ھزارين نوجوان نشي جا عادي ٿيڻ بعد مختلف ڏوھن جي ور چڙھي ويا آھن پر پوليس منٿليون وٺي ھٿ سان ڀرايون پئي ڪرائي. جسقم وائيس چيئرمين ڊاڪٽر غلام سرور خشڪ خطاب ڪندي چيو ته سنڌ جي وسيلن تي ڌارين جو قبضو آھي، پيپلز پارٽي سندن سھولتڪار بڻيل آھي. ھن چيو ته ھڪ طرف ڪينجھر ڍنڍ مان ڪراچي کي روزانو پاڻي فراھم ٿي رھيو آھي، ته ٻئي طرف ٺٽي جا ماڻھو مھينن کان پيئڻ جي پاڻي لاءِ ترسي رھيا آھن، ٺٽي جي ڪوھستاني ۽ سامونڊي پٽي جي ھزارين ايڪڙ زمين ڀڳڙن مٺ عيوض غير مقامي ماڻھن حوالي ڪئي پئي وڃي. جسقم جي سينيئر اڳواڻ ڊاڪٽر نياز ڪالاڻي خطاب ڪندي چيو ته جيڪي اليڪشن کٽي آيا آھن اھي سنڌ جا نمائندا ناھن سنڌ جا نمائندا ڳاڙھي جھنڊي وارا آھن، اسيمبلي سنڌ جي آھي پر ان کان وڌيڪ ٻي بي حسي ڪھڙي ٿيندي جو سنڌ اسيمبلي ۾ افغاني پٽڪو پائي اچي حلف کڻي ٿو، سنڌ حڪومت ڌارين کي سگھارو ڪيو آھي. ان موقعي تي پنهل ساريو ، جسقم جي مرڪزي اڳواڻن ديدار شام، مومن سمون جساف جو مرڪزي صدر اشرف ڪلهوڙو، غلام نبي کٽي، نظام جوکيو، اسد گوپانگ، بابو جان خشڪ، سراج سرور خشڪ، محمد علي شيخ، ۽ ٻين پڻ خطاب ڪيو .
