حيدرآباد (رپورٽ: منير راڄڙ) سنڌ سيڊ ڪارپوريشن حيدرآباد پاران قائدن ۽ ضابطن جي ابتڙ ڪروڙين رپين جي زرعي ڀاڻ، ڊي اي پي ۽ جراثيم ڪش دوائن جي خريداري جو انڪشاف ٿيو آهي. سنڌ سيڊ ڪارپوريشن (ايس ايس سي) حيدرآباد انتظاميا سال 22-2023ع دوران 5 ڪروڙ 20 لک 45 هزار رپيا ادا ڪيا ته جيئن هارين کي ڀاڻ، ڊي اي پي (ڊائي امونيم فاسفيٽ) ۽ جراثيم ڪش دوائن جي خريداري لاءِ انتظاميا کي کليل ٽينڊر ذريعي خريد ڪرڻ گهرجي ها پر ان جي بدران هارين کي سڌو پرچون ڏيندڙن کان خريد ڪرڻ جي اجازت ڏني وئي. دستاويزن مطابق خريداري جي عمل ۾ ڪو به مقابلو نه ڪيو ويو آهي جيڪو قانون جي ڀڃڪڙي آهي تنهن ڪري 5 ڪروڙ 20 لک 45 هزار رپين جي خريداري غيرقانوني قرار ڏني وئي آهي. دستاويزن موجب معاملو انتظاميا کي 31 جولاءِ 2023ع تي رپورٽ ڪيو ويو جنهن تي انتظاميا پنهنجي جواب ۾ بيان ڪيو ته انهن شروعاتي طور تي 5 ڪروڙ 20 لک 45 هزار رپيا ڀاڻ ۽ جراثيم ڪش جي خريداري لاءِ ادا ڪيا هئا پر محدود فنڊن جي ڪري رقم مختص نه ٿي سگهي جنهن جي ڪري ڪجهه مواد خريد ڪيو ويو ۽ بعد ۾ انهن خرچن کي ايڊجسٽ ڪيو ويو. انتظاميا جو جواب تسلي بخش نه هو ڇو ته خريداري ٽينڊر کانسواءِ ڪئي وئي جيڪا ايس پي پي آر اي رولز جي ڀڃڪڙي آهي. ياد رهي ته سنڌ پبلڪ پروڪيورمينٽ (ايس پي پي آر اي) رولز 2010ع جي رول 4 جي مطابق جڏهن سامان، ڪم يا خدمتن جي خريداري ڪئي پئي وڃي ته خريداري ادارن کي يقيني بڻائڻ گهرجي ته خريداري جو عمل منصفاڻي ۽ شفاف طريقي سان ڪيو وڃي ۽ خريداري جو مقصد اداري کي بهترين قيمت فراهم ڪرڻ ۽ خريداري جو عمل موثر ۽ سستو هجي. رول 15 (1) جي مطابق کليل مقابلي واري ٻولي کي خريداري جو بنيادي طريقو قرار ڏنو ويو آهي
