ڪراچي: چيف جسٽس آف پاڪستان جسٽس گلزار احمد چيو آهي ته ڪي اليڪٽرڪ عوام کي بليڪ ميل ڪري رهي آهي ۽ رڳو پئسا ڪمائي رهي آهي
سپريم ڪورٽ ڪراچي رجسٽري ۾ پي اي سي ايڇ ايس ۾ گرين بيلٽ تي ڪي اليڪٽرڪ جي گرڊ اسٽيشن جي تعمير بابت ڪيس جي ٻڌڻي دوران عدالت ڪي اليڪٽرڪ جي ڪارڪردگي تي سخت ڪاوڙ جو اظهار ڪيو
چيف جسٽس پڇاڻو ڪيو ته ڇا ڪي اليڪٽرڪ گرين بيلٽ تي گرڊ اسٽيشن ٺاهڻي هئي؟ جڏهن ته جسٽس اعجاز الاحسن پي ايس ايڇ ايس جي وڪيل کان پڇاڻو ڪيو ته ڪي اليڪٽرڪ کي توهان کي بجلي ڏيڻي هئي ان ڪري توهان جاءِ ڏني؟
وڪيل پي اي سي ايڇ ايس چيو ته اسان قومي مفاد ۾ ڪي اليڪٽرڪ کي نارمل ريٽ تي جاءِ ڏني هئي، جسٽس گلزار احمد رمارڪس ڏنا ته ڪهڙو قومي مفاد، ڪي اليڪٽرڪ ڪاروبار ڪري رهيو آهي، ڪهڙي عوامي خدمت ڪري رهيو آهي؟
ڪي اليڪٽرڪ جي وڪيل چيو ته توهان محمود آباد ۽ پي اي سي ايڇ ايس بابت چڱي ريت ڄاڻو ٿا، جنهن تي چيف جسٽس چيو ته ها اسان کي خبر آهي ته اسان سڀ اتي ڪرڪيٽ کيڏندا رهيا آهيون پر گرين بيلٽ تي گرڊ اسٽيشن ٺاهڻ جي اجازت نه ڏينداسين، جسٽس اعجاز الاحسن چيو ته ڪي اليڪٽرڪ کي گرڊ اسٽيشن هٽائڻ ۾ ڪيترو وقت گهرجي؟
چيف جسٽس گلزار احمد چيو ته پرائيويٽ ماڻهو آهن جن وٽ بجلي آهي خبر ناهي ڪٿان کان آيا آهن، ڪيترا گرڊ اسٽيشن ٺاهيو پر لوڊشيڊنگ ختم نه ٿي، ماڻهن کي صرف ٻه، ٻه ٽي ٽي ڪلاڪ بجلي ملي ٿي
جسٽس گلزار احمد چيو ته اسان کي ڪي اليڪٽرڪ جي هڪ انچ انچ جي خبر آهي، جتي گرڊ اسٽيشن ٺاهيا ويا اتان جي ماڻهن کان پڇو اتي به لوڊشيڊنگ آهي
چيف جسٽس رمارڪس ڏيندي چيو ته نيشنل گرڊ سان توهان جو معاهدو ختم ٿي ويو آهي، توهان گيس جا پئسا نه ٿا ڏيو، ڪي اليڪٽرڪ عوام کي تنگ ۽ بليڪ ميل ڪري رهي آهي، اها هڪ پرائيويٽ ڪمپني آهي جيڪا عوام کي نڪ ۽ ڪن سان ڇڪي رهي آهي، ڪي اليڪٽرڪ معاهدي موجب هڪ واٽ جو واڌ نه ڪيو
جسٽس گلزار احمد چيو ته ڪي اليڪٽرڪ سڄي شهر مان ٽامي جون تارون هٽائي هڪ ڏينهن ۾ اربين ڊالر ڪمايا، بجلي چوري ٿئي ٿي ته ان جا پئسا به ٻين ماڻهن کان وصول ڪن ٿا
جسٽس قاضي امين ڪي اليڪٽرڪ جي وڪيل کان پڇاڻو ڪيو ته اليڪٽرڪ گرڊ اسٽيشن ڪڏهن هٽائي ويندي، عام ڳالهه آهي توهان جو هڪ خانگي ادارو آهي
چيف جسٽس گلزار احمد رمارڪس ڏيندي چيو ته ڪنهن کي خبر ناهي ته ڪي اليڪٽرڪ جو مالڪ ڪير آهي، شايد ان جي سي اي او کي خبر آهي، ڪي اليڪٽرڪ جي بورڊ آف ڊائريڪٽرز ۾ رڳو اها ڳالهه آهي ته پئسا، پئسا، پئسا
سپريم ڪورٽ گرين بيلٽ کانسواءِ گرڊ اسٽيشن هٽائڻ واري معاملي تي ڪي اليڪٽرڪ جي وڪيل کي هدايتون طلب ڪرڻ لاءِ سڀاڻي تائين مهلت ڏئي ڇڏي
ھي به پڙھندا
سنڌ جي اڌ کان وڌيڪ زمينن تي قبضا آهن، اسان کي لولي پاپ نه ڏيو: چيف جسٽس
