نئين دهلي (م ڊ) گوگل ميپ مسافرن کي موت جي منهن ۾ وٺي ويو، 3 ڄڻا فوت ٿي ويا. ان ڏس ۾ ميڊيا موجب ڀارت ۾ گوگل ميپ جي ٻڌايل رستي تي سفر ڪندڙ گاڏي تعمير ٿيندڙ پُل تان ڪِري پئي. ڀارتي ميڊيا موجب بدايون شهر کان فريد پور ڏانهن ويندڙ گاڏي بريلي ۾ رام گنگا ندي تي تعمير هيٺ پل تان هيٺ ڪِري.50 فوٽ اوچائي تان ڪرندڙ گاڏي ۾ سوار ٻن ڀائرن سميت 3 نوجوان ٿڏي تي فوت ٿي ويا. وارثن موجب نوجوان گوگل ميپ جي رهنمائي ۾ سفر ڪري رهيا هئا، جي پي ايس پُل جو رستو ڪليئر ڏيکاريو پر اڳتي پل موجود نه هئي. وارثن چيو ته انتظاميا به ڪا رنڊڪ نه لڳائي هئي، جيڪڏهن رنڊڪ هجي ها ته افسوسناڪ واقعو پيش نه اچي ها.
