ڪلوئي (ن پ ا) ڪلوئي ۾ پاڻي کوٽ خلاف آبادگارن جي ٽئين ڏهاڙي به بک هڙتال خبر موجب ڪلوئي جي رڻ شاخ ۽ ڏيپلو مائينر جي شاخن جي پُڇڙين ۾ پاڻي جي هٿرادو کوٽ خلاف آبادگارن پاران اڻ اعلانيل مُدي تائين ڪراچي ٿرڪول مين روڊ تي ونگو پتڻ وٽ ۽ بلوچ آباد تي قائم ڪيل ڌار ڌار بُک هڙتالي ڪئمپن تي ڪالهه ٽئين ڏهاڙي به بک هڙتال جاري رکندي مسئلي جي حل تائين ڪئمپون قائم رکڻ جو اعلان ڪيو ويو آهي، ان سلسلي ۾ آبادگارن نواز خان، بابو لنڊ، علي بهادر لنڊ، ٽيل ايسوسيئيشن صدر عثمان ھالو، مولوي محمد رمضان لنڊ ۽ ٻين چيو ته چيٽ جي پوکائي جي سيزن ھلي رهي آهي، پر آبپاشي عملدار اسان جي حصي جو پاڻي مُنڍ جي زميندارن کي وِڪرو ڪري اسان سان ظلم ڪري رهيا آهن، انصاف نه مليو ته احتجاج جو دائرو وڌائينداسين.
