ڪرمپور (ن پ ا) ڪرمپور ڀرسان رات دير سان هٿياربندن انڊس هاءِ وي تي الاهي بخش لاڙي وٽ مسافر گاڏين مٿان فائرنگ ڪئي هئي، هٿياربندن جي فائرنگ ۾ ٽرڪ ڊرائيور زاڪر حسين کوسو ۽ 2 واٽھڙو زخمي ٿي پيا هئا،هٿياربند ڊيره الهيار واسي ڪلينر وزير کوسو کي ٽرڪ مان لاهي اغوا ڪري ويا، مغوي جي وارثن موجب ٽرڪ ۾ ڊرائيور ذاڪرحسين کوسو ۽ ڪلينر وزير حسين کوسو گڏ هئا، ڌاڙيلن جي فائرنگ ۾ ڊرائيور زخمي پيو ۽ ڪلينر وزير کوسو کي هٿياربند اغوا ڪري ويا آهن، مغوي جي ڀاءُ عيدن کوسو مطالبو ڪيو ته نوٽيس وٺي مغوي کي بازياب ڪرايو وڃي. ٻي طرف اغوا ٿيل ٽرڪ ڪلينر وزير کوسو جي بازيابي لاءِ پوليس پاران ڳڙھي تيغو ڀرسان ڳوٺ خان محمد سبزوئي تي چڙھائي ڪئي ته ڏوهارين ۽ پوليس وچ ۾ مقابلو ٿي پيو،فارنگ جي ڏي وٺ ۾ 5 پوليس اهلڪار زخمي ٿي پيا، زخمي ٿيلن ۾ پوليس اهلڪار جان محمد ڪٽو، اعتبار گولو، حصام الدين سهرياڻي، رياض لاشاري ۽ ھاشم مهر شامل آهن،زخمي اهلڪارن کي سکر جي اسپتال منتقل ڪيو ويو، هوڏانهن پوليس طرفان آپريشن ۾ ٽن جوابدارن کي زخمي ڪرڻ جي دعويٰ ڪئي وئي آهي، پوليس ۽ ڏوهارين پاران هڪٻئي مٿان راڪيٽ لانچر جا گولا پڻ فائر ڪيا ويا، پوليس ترجمان موجب ڏوهاري نثار سبزوئي جي ٽولي خلاف آپريشن هلندڙ آهي ڏوهارين جا ٺڪاڻا ڊاهي پٽ ڪيا آهن، پوليس جي فائرنگ ۾ 3 ڏوهاري زخمي ٿيا آهن جن کي ساٿي کڻي فرار ٿي ويا.
