لاهور(اسورٽس نيوز) پاڪستان ڪرڪيٽ بورڊ ( پي سي بي ) چيف آپريٽنگ آفيسر سمير احمد سيد کي پاڪستان ۾ رٿيل آءِ سي سي چيمپيئنز ٽرافي 2025ع لاءِ ٽورنامينٽ ڊائريڪٽر مقرر ڪري ڇڏيو. بورڊ طرفان جاري ڪيل پڌرائي ۾ چيو يو ويو آهي ته سمير احمد هڪ غير معمولي منظم پروفيشنل آهي جنهن ۾ انتظامي مهارت سان گڏوگڏ ڪرڪيٽ لاءِ جذبو موجود آهي ۽ اسان کي اميد آهي هو رانديگرن ۽ تماشائين لاءِ ناقابلِ فراموش آءِ سي سي چيمپيئنز ٽرافي جو انعقاد ممڪن بڻائيندو. ان موقعي تي ٽورنامينٽ ڊائريڪٽر سمير احمد جو چوڻ هو ته هو ٽورنامينٽ لاءِ اهم ذميواري سنڀالڻ کي اعزاز سمجهي ٿو جيڪا پاڪستان ڪرڪيٽ بورڊ کيس ڏني آهي. هن چيوته اسٽيڊيم جي اَپ گريڊيشن جو ڪم مڪمل ٿيڻ وارو آهي ۽ آءِ سي سي سان اهم معاملن تي مشاورت جاري آهي. ٽورنامينٽ ڊائريڪٽر وڌيڪ چيو ته سندن تجربيڪار ٽيم ڪاميابي سان پاڪستان سپر ليگ جي منصوبابندي سميت ڪيئي اهم ايونٽس جا انتظام سنڀالي ۽ نڀائي چڪي آهي.
