راولپنڊي(م ڊ) پاڪستان سپر ليگ (پي ايس ايل) جي ڏهين ايڊيشن جي ٻي ميچ ۾ ڪوئيٽا گليڊيئيٽرز زبردست ڪارڪردگي جو مظاهرو ڪندي پشاور زلمي کي 80 رنسن تان مات ڏيئي ڇڏي. راولپنڊي ڪرڪيٽ اسٽيڊيم ۾ کيڏيل ميچ ۾ پشاور زلمي ٽاس کٽي پهرين بالنگ جو فيصلو ڪيو، جيڪو ڪوئيٽا لاءِ لاڀائتو ثابت ٿيو، ڪوئيٽا گليڊيئيٽرز پهريان کيڏندي مقرر 20 اوورن ۾ 3 وڪيٽن جي نقصان تي 216 رنسون ٺاهيون. ڪپتان سعود شڪيل ۽ فن ايلن وچ ۾ پهرين وڪيٽ لاءِ 88 رنسن جي ڀائيواري قائم ٿي. سعود شڪيل 59 ۽ فن ايالن 53 رنسن سان ٽاپ اننگز کيڏي، ٻين رانديگرن ۾ حسن نواز 41، ڪوشل مينڊس 35 ۽ رائيلي روسو 21 رنسون ٺاهي نمايان رهيا. پشاور زلمي طرفان علي رضا، سفيان مقيم ۽ الزاري جوزف هڪ، هڪ وڪيٽ ورتي. ڪوئيٽا جي 217 رنسن جي هدف پٺيان ڊوڙندي پشاور زلمي جو ڪو به بيٽر وڪيٽ کي گهڻي دير جٽاءُ نه ڪري سگهيو ۽ پوري ٽيم 136 رنسن تي ڍير ٿي ويئي. پشاور زلمي جو ڪپتان ۽ تجريبڪار بيٽر بابر اعظم کاتو کولڻ بنا محمد عامر جي بال تي رائيلي روسو هٿان ڪئچ آئوٽ ٿي ويو. ڊگهي عرصي کانپوءِ ميدان ۾ واپسي ڪندڙ صائم ايوب 50 رنسو ٺاهي سڀ کان اڳرو رهيو، جڏهن ته حسين طلعت 35 ۽ مچل اوون 31 رنسون ٺاهيون. ڪوئيٽا جي ابرار احمد زلمي جي بيٽرن کي وائڙو ڪري ڇڏيو ۽ چار شڪار ڪيا، جڏهن ته محمد عامر ۽ عثمان طارق ٻن، ٻن رانديگرن کي پويلين جو رستو ڏيکاريو. شاندار اسپيل تي ابرار احمد کي پليئر آف دي ميچ قرار ڏنو ويو
