ممبئي(شوبز نيوز) شاهه رخ خان کي ٽيم ۾ پاڪستاني رانديگرن کي شامل ڪرڻ تي مشڪلاتن کي منهن ڏيڻو پئجي رهيو آهي، بالي ووڊ سپر اسٽار شاهه رخ خان ڪيريبين پريميئر ليگ (سي پي ايل) ۾ ٻن پاڪستاني ڪرڪيٽرن، محمد عامر ۽ محمد عثمان طارق کي پنهنجي ٽيم ٽرنباگو نائيٽ رائيڊرز (ٽي ڪي آر) لاءِ سائن ڪيو آهي. محمد عامر اڳ ۾ سي پي ايل جا 4 سيزن کيڏي چڪو آهي ۽ 39 سي پي ايل ميچن ۾ 18.09 جي شاندار اوسط سان 51 وڪيٽون حاصل ڪيون آهن. ٻئي طرف، آف اسپنر محمد عثمان پهريون ڀيرو ويسٽ انڊين ميدانن تي پنهنجو ڊيبيو ڪندو. عثمان طارق پي ايس ايل 2025 ۾ ڪوئيٽا گليڊي ايٽرز لاءِ شاندار ڪارڪردگي ڏيکاري آهي، تازو پي ايس ايل سيزن جي صرف 5 ميچن ۾ 10 وڪيٽون حاصل ڪيون آهن. سوشل ميڊيا تي هن خبر جي سامهون اچڻ کان پوءِ، هندستاني استعمال ڪندڙ سپر اسٽار تي تنقيد ڪري رهيا آهن ۽ مطالبو ڪري رهيا آهن ته ڊيل کي فوري طور تي ختم ڪيو وڃي. هندستاني ميڊيا جي رپورٽن موجب، امڪان آهي ته شاهه رخ خان کي به هندو انتهاپسندن جي ڪنهن قسم جي رد عمل کي منهن ڏيڻو پوي ٿو جيئن ماضي ۾ ائين ٿيندو رهيو آهي. ياد رهي ته اڄڪلهه مشهور ڳائڻو ۽ اداڪار دلجيت دوسانجھ به هندستاني انتها پسندن جو نشانو آهي. هن پنهنجي پنجابي فلم سردار جي 3 جو ٽريلر جاري ڪيو، جنهن ۾ پاڪستاني اداڪارا هانيا عامر شامل آهي. دلجيت دوسانجھ خلاف هندستان ۾ مهم شروع ڪئي وئي آهي ۽ کيس هڪ پاڪستاني اداڪارا سان ڪم ڪرڻ تي ڌمڪيون پڻ ڏنيون پيون وڃن.
