ٽنڊو آدم (ن پ ا) ٽنڊي آدم ويجهو ٽن ڌار ڌار روڊ حادثن ۾ پيءُ ڌيءُ سميت 3 ڄڻا فوت، 6 زخمي، رپورٽ موجب فوجي موڙ اسٽاپ ڀرسان موٽر سائيڪل تي سوار لاشاري برادري جي فيملي کي ٽريڪٽر ٽرالي ٽڪر هنيو، جنهن جي نتيجي ۾ ڳوٺ بلال شاھ واسي 46 ورهين جو دلاور لاشاري ٿڏي تي فوت ٿي ويو، جڏهن ته سندس ڌيءُ 18 ورهين جي شھزادي لاشاري، 2 پٽ 7 ورهين جو بلال لاشاري ۽ 3 ورهين جو آصف لاشاري زخمي ٿي پيا، بي سيڪشن پوليس پهچي لاش تعلقي اسپتال آندو، جڏهن ته زخمين کي نجي اسپتال آندو ويو، جتي 18 ورهين جي ناري شھزادي زخمن جي سٽ نه سهندي دم ڌڻي حوالي ڪري ڇڏيو، ضروري ڪارروائي بعد پيءُ ڌيءُ جا لاش وارثن حوالي ڪيا ويا، ٻئي پاسي ملان مکڻ وٽ ڀٽ شاھ روڊ تي ٻن تيز رفتار موٽر سائيڪلن ۾ ٽڪر لڳڻ جي نتيجي ۾ 35 ورهين جي ميرجي ڀيل زخمي ٿي پئي، جنهن اسپتال ۾ دم ڏئي ڇڏيو، عورت جو لاش ضروري ڪارروائي بعد وارثن حوالي ڪيو ويو، ٽئين حادثي ۾ چاڪراڻي چيڪ پوسٽ ڀرسان لانڍي روڊ تي ٻن تيز رفتار موٽر سائيڪلن ۾ ٽڪر ٿي پيو، جنهن ۾ 4 ڄڻا بابر، ذيشان، فيضان ۽ شاھ عالم سخت زخمي ٿي پيا.
