حيدرآباد (رپورٽ: منير راڄڙ) ٽريڊنگ ڪارپوريشن پاڪستان ۾ به ڪرپشن جي گونج، ڪڻڪ جي درآمد تي غير مجاز ڪميشن جي ڪٽوتي ڪري 70 ڪروڙ رپين کان وڌيڪ رقم ڪمائي وئي. تفصيل موجب صوبائي حڪومتن جي سرڪاري ۽ نيم سرڪاري ادارن وانگر وفاق جي ماتحت ادارن ۽ ڪارپوريشنن ۾ به قاعدن ۽ ضابطن جي خلاف سرگرميون جاري آهن. ”پنهنجي اخبار“ کي مليل معلومات موجب وفاقي ڪابينا جي اقتصادي رابطا ڪاميٽي 30 سيپٽمبر 2020ع جي خط ذريعي درآمد ٿيل ڪڻڪ ۽ کنڊ جي سي اينڊ ايف ويليو تي ٽي سي پي جي ڪميشن چارجز کي 0.75 سيڪڙو تائين گهٽائڻ جي منظوري ڏني هئي. سال 22-2023ع دوران ٽريڊنگ ڪارپوريشن آف پاڪستان جي هيڊ آفيس جو آڊٽ ڪيو ويو ته اهو مشاهدو سامهون آيو ته انتظاميا 0.75 سيڪڙو جي منظوري واري شرح جي بدران ڪڻڪ جي گھٽ قيمت جي سي ۽ ايف قيمت تي 2 سيڪڙو ڪميشن چارج ڪئي جيڪا اي سي سي جي فيصلي جي ڀڃڪڙي آهي. اهڙي طرح 1.25 سيڪڙو اضافي ڪميشن وصول ڪئي وئي جنهن جي نتيجي ۾ 70 ڪروڙ 30 لک رپين کان وڌيڪ نقصان ٿيو. مليل دستاويزن موجب ٽريڊنگ ڪارپوريشن جي انتظاميا اي سي سي جي فيصلي جي ڀڃڪڙي ڪندي ڪميشن چارج ڪيو جيڪو غير منظم ۽ غير منصفاڻي آهي. هي معاملو 28 نومبر 2023ع تي انتظاميا کي رپورٽ ڪيو ويو. 16 جنوري 2024ع تي ڊي اي سي جي اجلاس ۾ ان بي ضابطگي تي بحث ڪيو ويو. ڊي اي سي انتظاميا کي هدايت ڪئي ته هو مستقبل جي ڪميشن جي شرح بابت وضاحت حاصل ڪري. ان سلسلي ۾ هڪ سمري اي سي سي ڏانهن موڪلي وڃي. ان کان علاوه اي سي سي ڪڻڪ ۽ کنڊ جي درآمد ٿيل سي ۽ ايف وي تي ڪميشن جي شرح کي 0.75 سيڪڙو تائين گهٽائي ڇڏيو آهي. بنا ڪنهن شرط جي تنهن ڪري اها سفارش ڪئي وئي آهي ته ڊي اي سي جي هدايتن تي عمل ڪيو وڃي.
