ٺري ميرواهه/ٽندو مير علي (نمائندن وٽان) ٺري ميرواهه ويجهو مھراڻ ھاءِ وي تي ٽرڪ ۽ ڪار ۾ ٽڪر، ويم لاءِ اسپتال ويندڙ ڳورھاري عورت، سندس ناني ۽ ٽيڪسي ڊرائيور فوت، عورت جو مڙس ۽ امڙ زخمي، خبر موجب باک ڦٽي مهل مھراڻ ھاءِ وي تي سوئي گئس وٽ ٽرڪ ۽ ڪار وچ ۾ آمھون سامھون ٽڪر ٿي پيو، جنهن جي نتيجي ۾ ڪار ڪلٽيون کائي اونھي کاھي ۾ ڪري پئي، حادثي ۾ ڪار ۾ سوار ڳوٺ لطف علي شر واسي ويم لاءِ اسپتال ويندڙ ڳورھاري عورت ڪائنات، سندس ناني حضوران شر، مڙس منصور شر ، امڙ عابدهه ۽ ڪار ڊرائيور بشير شر سخت زخمي ٿي پيا، جن کي مقامي ماڻھو ڪار مان ڪڍي علاج لاءِ گمبٽ اسپتال کڻائي وڃي رھيا ھئا ته ڳورهاري عورت ڪائنات شر، سندس ناني حضوران شر ۽ ڪار ڊرائيور بشير شر رستي ۾ زخمن جا سور نه سھندي فوت ٿي ويا، جڏھن ته منصور شر ۽ سندس سس عابدهه شر کي گمس اسپتال نيو ويو، ھڪ ئي ڳوٺ سان تعلق رکندڙ ٽن ماڻھن جي فوت ٿيڻ واري واقعي سبب علائقي ۾ ماحول سوڳوار ٿي ويو، ٽنھي فوتين جا لاش ضروري ڪارروائي بعد وارثن حوالي ڪيا ويا، مڙهه اباڻي ڳوٺ پھچائڻ تي گهر ۾ ڪھرام مچي ويو، وارثن موجب ڪائنات شر جي ويم جي سلسلي ۾ ايمرجنسي ۾ باک ڦٽي وقت گمبٽ اسپتال وڃي رھيا ھئاسين ته ٽرڪ سان ٽڪر ٿيڻ سبب حادثو پيش آيو.
