لاهور(اسپورٽس نيوز) قومي ٽيم جي اڳوڻي هيڊ ڪوچ جيسن گليسپي انڪشاف ڪيو آهي ته پاڪستان ڪرڪيٽ بورڊ (پي سي بي) اڃا تائين سندس واجبات ادا نه ڪيا آهن. هڪ مقامي سوشل ميڊيا پليٽ فارم سان انٽرويو ۾، قومي ٽيم جي اڳوڻي هيڊ ڪوچ جيسن گليسپي پاڪستان جي ڪوچنگ جي پنهنجن تجربن بابت کليل طور تي ڳالهايو ۽ چيو ته پاڪستان ڪرڪيٽ بورڊ (پي سي بي) اڃا تائين سندس واجبات ادا نه ڪيا آهن. هي صورتحال ڪافي مايوس ڪندڙ آهي، پر اميد آهي ته هي معاملو جلد کان جلد حل ٿي ويندو. آسٽريلوي ڪرڪيٽر ۽ ڪوچ جيسن گليسپي، جنهن کي اپريل 2024 ۾ پاڪستان ٽيسٽ ٽيم جو ڪوچ مقرر ڪيو ويو هو، ڊسمبر 2024 ۾ استعيفيٰ ڏئي ڇڏي. پنهنجي مختصر مدت دوران، هن وائيٽ بال ڪوچ گيري ڪرسٽن جي استعيفيٰ کان پوءِ ون ڊي فارميٽ ۾ ڪوچنگ جون ذميواريون پڻ سنڀاليون. جيسن گليسپي چيو ته بورڊ انتظاميا جي هڪ طرفي فيصلن مون کي استعيفيٰ ڏيڻ تي مجبور ڪيو، محمد رضوان کي ڪپتان بڻائڻ جهڙا حيران ڪندڙ فيصلا، جنهن ٽيم کي نقصان پهچايو، پاڪستان ڪرڪيٽ جنون جي چڪر ۾ ڦاسي پئي آهي. واضح رهي ته جيسن گليسپي جي استعيفيٰ کان پوءِ بورڊ عاقب جاويد کي هيڊ ڪوچ جون عبوري ذميواريون ڏنيون هيون. جڏهن ته، خراب ڪارڪردگي جي ڪري، بورڊ اڄ نئين هيڊ ڪوچ جي ڳولا لاءِ هڪ اشتهار جاري ڪيو آهي.
