لاڙڪاڻو (بيورو رپورٽ) آرٽس ڪائونسل آف پاڪستان لاڙڪاڻو طرفان ڊراما فيسٽيول شروع ٿي ويو آهي. ان سلسلي ۾ آرٽس ڪائونسل آف پاڪستان لاڙڪاڻو جي ڊراما فيسٽيول جو پهريون اسٽيج ڊرامو ليکڪ شميم عباسي جو لکيل “ھڙئي ھڪ جھڙا” مسرت ناز ۽ رياض مهيسر جي هدايتڪاري هيٺ پيش ڪيو ويو. جنهن ۾ مسرت ناز، رياض مهيسر، خالد ڀٽو، سجاد سومرو، سانوري فل، امجد گل سومرو ۽ ٻين اداڪارن پنهنجي فن جو ڀرپور مظاهرو ڪيو. ڊرامي جو موضوع ھو ھڪ غريب ڇوڪري جنھن جي عزت محفوظ نه پئي رھي اھا ڇوڪري انھن ڀائرن وٽ اچي رھي ٿي جيڪي ڇڙا آھن پر ان ڇوڪريءَ کي نيڪ نگاھن سان ڏسن ٿا، ھو چاھن ٿا ته ڇوڪري اسان مان ڪنهن به ھڪ سان شادي ڪري پر ڇوڪري جو ٻئي ھنڌ رشتو ٿي ٿو وڃي ٿو، اهڙي طرح ڊرامو پنهنجي پڄاڻيءَ تي پهچي ٿو. ڊرامي دوران مزاحيه اداڪار امجد گل سومرو پنهنجي ٽوٽڪن جي ذريعي ويٺل ماڻهن کي کلائي کلائي کيرو ڪري ڇڏيو.
