غزه / بيروت / تل ابيب (م ڊ) غزه ۽ لبنان ۾ جهڙپن دوران 4 اسرائيلي فوجي مارجي ويا، 9 زخمي ٿي پيا، اسرائيلي ميڊيا موجب ڏکڻ لبنان ۾ حزب الله سان جهڙپن ۾ 3 اسرائيلي فوجي مارجي ويا، جڏهن ته 8 زخمي ٿيا، ٻئي طرف غزه جي علائقي جباليه ۾ به فلسطيني ويڙهاڪن جي حملي ۾ هڪ اسرائيلي فوجي مارجي ويو هڪ زخمي ٿي پيو. اسرائيلي ميڊيا موجب جنگ ۾ هن وقت تائين مارجي ويل اسرائيلي فوجين جو تعداد 800 ٿي ويو، هوڏانهن اسرائيلي فوج طرفان لبنان ۾ 100 کان وڌيڪ هدفن تي حملا ڪيا ويا، 4 لبناني فوجين سميت 13 لبنانين کي شهيد ڪرڻ جي دعويٰ ڪئي وئي. جباليه ۽ رفع ۾ بمباري سان 80 کان وڌيڪ فلسطيني شهيد ٿيا. اسرائيلي فوج ڪمال عدوان اسپتال جو گهيرو ڪري ورتو، ايمبولينسز جي داخلا به روڪي وئي. اسپتال ۾ دوائن ۽ خوراڪ جي شديد کوٽ پيدا ٿي وئي.
