عمرڪوٽ ۾ مڪاني ادارن جي اڪائونٽس ۾ڪروڙين رپيا موجود: ترقياتي ڪم بند: عوام کي ٽڪي جو لاڀ نه مليو

عمر ڪوٽ: ضلعي جي 42 يوسيز جي اڪائونٽس ۾ پيل رقم جا انگ اکر پنهنجي اخبار هٿ ڪري ورتا. ذريعن موجب ڊسمبر 2024ع جي پڄاڻي تائين يونين ڪائونسل ڊيٻو ۾ 5 ڪروڙ 47 لک ڪونجيلي ۾ 10 ڪروڙ 11 لک عطا محمد پلي ۾ 05 ڪروڙ 38 لک کاروڙو سيد يوسي ۾ 14 ڪروڙ 66 لک حاجي ميان شاھه ۾ 11 ڪروڙ 82 لک نيوڇور ۾ 02 ڪروڙ 44 لک کوکراپار يوسي ۾ 05 ڪروڙ 35 لک مھيندري جو پار يوسي ۾ 06 ڪروڙ 69 لک پيل آهن، کاروڙو چارڻ ۾ 09 ڪروڙ 37 لک يوسي شيخڙو ۾ 21 ڪروڙ 86 لک ڪپلور ۾ 04 ڪروڙ 30 لک يوسي ڪچولي ۾ 08 ڪروڙ 32 لک جانھيرو يوسي ۾ ھڪ ڪروڙ 95 لک يوسي فقير عبدالله ۾ 06 ڪروڙ 33 لک يوسي کيجراڙي ۾ 03 ڪروڙ 64 لک روپيا يوسي ميان جان محمد ۾ 05 ڪروڙ 44 لک يوسي وليداد پلي ۾ 13 ڪروڙ 17 لک يوسي صوفي فقير ۾ 02 ڪروڙ 90 لک يوسي گپنو ۾ 13 ڪروڙ 54 لک جي بجيٽ موجود آهي، يوسي نواب آباد مانجھاڪر ۾ 08 ڪروڙ 96 لک يوسي ٻُسٽان ۾ 05 ڪروڙ 67 لک يوسي شھيد راجا اقبال ميمڻ ۾ ھڪ ڪروڙ 66 لک يوسي نبي سر ٿر ۾ 06 ڪروڙ 75 لک يوسي شھيد مائي بختاور ۾ 08 ڪروڙ 56 لک يوسي ٽالھي ۾ 07 ڪروڙ 66 لک يوسي دڙيلو ۾ 06 ڪروڙ روپيا يوسي شيرخان چانڊيو ۾ ھڪ ڪروڙ 71 لک روپيا پيل آهن، يوسي آراڙو ڀرڳڙي ۾ 06 ڪروڙ ھڪ لک رپيا يوسي گلزار خليل ۾ 05 ڪروڙ 52 لک روپيا يوسي ستڙيون ۾ 03 ڪروڙ 69 لک يوسي نورخان ڌونڪائي ۾ 05 ڪروڙ 24 لک يوسي سامارو روڊ ۾ 06 ڪروڙ 44 لک يوسي سامارو ون ۾ 06 ڪروڙ 98 لک رپيا يوسي ٽوڀان شاخ ۾ 05 ڪروڙ 26 لک جي بجيٽ موجود آهي جڏهن ته يوسي پڌريو ۾ 06 ڪروڙ 31 لک يوسي حاجي پير شاھه 05 ڪروڙ 66 لک يوسي ٻريجي ۾ 06 ڪروڙ 58 لک يوسي مخدوم طالب المولي ۾ 04 ڪروڙ 45 لک يوسي پٿورو ۾ 04 ڪروڙ 95 لک يوسي شاھه مردان شاھه ۾ 05 ڪروڙ 37 لک ۽ يوسي غلام نبي شاھه ۾ 03 ڪروڙ 61 لک کان وڌيڪ بجيٽ پيل آھي.

عمرڪوٽ: ضلعي جي 42 يونين ڪائونسلن ۾ ڪروڙين رپين جا فنڊز ۽ بجيٽ موجود ھوندي به انھن کي ڪتب آڻي نه سگھڻ بابت موقف وٺڻ لاءِ ڊائريڪٽر عمرڪوٽ ھريش ڪمار کتري سان فون تي رابطي جي ڪوشش ڪئي وئي، پر رابطو ٿي نه سگھيو جڏھن ته يوسي ميان جان محمد جي چئرمين عارف مھر رابطو ڪرڻ تي ٻڌايو ته سڀ ڪم بند لڳا پيا آھن، پ پ جي چئرمينن وارين يوسيز جا فنڊز به بند آھن چون ٿا ته سيڪريٽرين ۽ آفيسرن کي سياسي ماڻھن چونڊيل مقامي ايم پي ايز ۽ نمائندن سختي سان منع ڪئي آھي ته ھڪ رپيو به اڪائونٽ مان جاري نه ڪيو وڃي ھن چيو ته سڄي ضلعي ۾ اسين اپوزيشن وارا ٻه چئرمين آھيون ڇا ٿا ڪري سگھون ٻه سال گذري ويا آھن باقي ٻه بچيا آھن اسان جو حق اسان کي نه مليو ته عدالت جو در کڙڪائينداسين.

عمرڪوٽ: ضلعي جي سڀ کان وڏي تعلقي عمرڪوٽ ۾  ڪُل 19 يونين ڪائونسلون قائم ٿيل آھن، پر وڏي حيرت جي ڳالھه اھا آھي جو انھن 19 يونين ڪائونسلن مان ڪيترائي سال گذرڻ  باوجود اڃان تائين 14 يونين ڪائونسلن جون آفيسون ئي تعمير ٿيل ناھن ۽ اُھي عمرڪوٽ شھر جي اندر موجود ميونسپل ڪميٽي عمرڪوٽ جي ھڪڙي وڏي بلڊنگ ۾ ھڪ ئي ڇت ھيٺ 14 آفيسون گڏيل طور ڪم ڪري رھيون آھن جن ۾ ٿر جي ڏورانھن علائقن کوکراپار مھيندري جو پار شيخڙو ڪچولي حاجي ميان شاهه کاروڙو چارڻ، ڪونجيلي، ميان جان محمد سميت ٻيون يونين ڪائونسلون شامل آھي جتي ڪنهن کي رهائشي سرٽيفڪيٽ حاصل ڪرڻو ُھجي ته ٿر واسي ڳوٺاڻا 80 ڪلوميٽر پنڌ ڪري عمرڪوٽ اچن ٿا ۽ ھزارين رپيا سندن خرچ رڳو رھائشي ۽ ڊيٿ سرٽيفڪيٽ حاصل ڪرڻ تي ٿيو وڃي جنھن اھم مسئلي کي حل ڪرڻ لاءِ ڪو به سنجيده نظر نٿو اچي.

عمرڪوٽ: مڪاني چونڊن بعد جولاءِ 2023ع ۾ يونين ڪائونسلن جي موجوده چونڊيل چئرمينن ۽ وائيس چئرمينن کي سندن عھدن جون چارجون حوالي ڪيون ويون، مليل ڄاڻ موجب ان وقت اڳ وارن چئرمينن جي دور جي ھر مھيني ايندڙ 05 لک رپين واري گرانٽ جا ھر يونين ڪائونسل ۾ لکين رپيا جمع ٿيل ۽ بچت پيل ھئا ذريعن موجب نون چونڊيل چئرمينن ۽ يوسي سيڪريٽرين جي گڏيل ملي ڀگت سان اھي لکين رپيا “چٻراڻو پروگرام” تحت ھڙپ ڪري مختلف بل پاس ڪرايا ويا ۽ انھن بلن جي ڪليئرنس لاءِ مڪاني کاتي جي آڊٽ لاءِ مقرر آڊٽ آفيسر به مبينه طور ڪردار ادا ڪيو جنھن تحت آفيسن جو رنگ روغن ڪرڻ، سلائي مشينون ورھائڻ، مڇرمار اسپري ڪرڻ ۽ پئٽرول ڊيزل خرچ ٿيڻ ڏيکاريو ويو چٻراڻو و پروگرام جو مطلب ته حصا پتي ڪري فنڊز ھڙپ ڪرڻ آھي ان سموري معاملي جي اڄ تائين ڪا به جاچ نه ٿي آھي ۽ لکين رپيا مبينا ڪرپشن جي نظر ٿي ويا جنھن جو ڪو به پڇاڻو نه ٿي سگھيو .