سکر (بيورو رپورٽ) سنڌ جونيئر پريميئر ليگ لاءِ سنڌ مان ٽئلينٽ جي ڳولها شروع، سکر ۽ لاڙڪاڻو ڊويزن لاءِ سکر ۾ ٽرائل مڪمل ٿي ويا. هڪ هزار کان وڌيڪ نوجوانن شرڪت ڪئي. جونيئرز ليگ ۾ سليڪشن لاءِ ٽيسٽ ڪرڪيٽر حسن رضا جي اڳواڻيءَ ۾ ٽيم سکر پهچي سکر ۽ لاڙڪاڻو ڊويزن سان تعلق رکندڙ نوجوانن کان ٽرائلز ورتا. هڪ هزار کان وڌيڪ نوجوان بيٽنگ، بالنگ توڙي وڪيٽ ڪيپر طور پي سي بي گرائونڊ سکر پهچي ٽرائلز ڏنا. حسن رضا توڙي آرگنائيزرس جو چوڻ هو ته 30 نومبر کان 13 ڊسمبر ڪراچي نيو ناظم آباد ۾ سنڌ پريميئرز ليگ جونيئرز شروع ٿي رهي آهي. سکر ۾ ورتل ٽرائلز ۾ نوجوانن بنا ڪنهن تربيت، ڪوچنگ باوجود سٺي راند جو مظاهرو ڪيو آهي. هنن چيو ته جونيئرز ليگ ڪرائڻ جو مقصد نوجوانن کي انٽرنيشنل سطح تي کيڏڻ جا موقعا فراهم ڪرڻ آهي. جونيئر ليگ ٽيم ۾ قومي ڪرڪيٽ ٽيم جا چار کلاڙي به شامل هوندا. سينيئر کلاڙين جي موجودگيءَ ۾ جونيئرز کي سکڻ جو موقعو ملندو. پاڪستاني اسٽار سنڌي پليئرز سان کيڏندا ته انهن کي تجربو ۽ ٽئلينٽ ڏيکارڻ جو موقعو ملندو. سنڌي ٻارڙن کي انٽرنيشنل سطح تي موقعا فراهم ڪرڻ جي لاءِ سنڌ پريميئر ليگ کان پوءِ جونيئزز ليگ منعقد ڪرائي پئي وڃي.
