ممبئي(شوبز نيوز) بالي ووڊ سپر اسٽار سلمان خان جا مداح سندس ڪرائي ۾ پهريل هيرن جي واچ جي قيمت ٻڌي حيران ٿي ويا. سلمان خان جي نئين وڊيو سوشل ميڊيا تي وائرل ٿي رهي آهي، جنهن ۾ ميگا اسٽار کي دنيا جي مهانگي ترين واچ برانڊ جو مالڪ جيڪب ايريبو کي کيس واچ پهرائيندي ڏسي سگهجي ٿو. جيڪب ايريبو جي آفيشل انسٽاگرام هينڊل تي پوسٽ ڪيل هڪ وڊيو ۾ اهو بالي ووڊ اسٽار کي پنهنجي برانڊ جي سڀ کان مهانگي واچ “بلينيئر III” پهرائي رهيو آهي. واچ تي لڳل سوين هيرن سان، ڪو به اندازو لڳائي سگهي ٿو ته واچ جي قيمت حيران ڪري ڇڏيندي. جيڪب ايريبو پنهنجي پوسٽ ۾ چيو ته مان پنهنجي واچ ڪڏهن به ڪنهن کي پائڻ لاءِ ناهي ڏني پر اها سلمان خان کي پارائي آهي. ڀارتي ميڊيا موجب واچ جي زنجير تي 504 هيرا جڙيل آهن جڏهن ته پوري واچ 714 قيمتي هيرن سان جڙيل آهي. بلينيئر III دنيا جي مهانگي ترين گھڙين مان هڪ آهي، جنهن جي قيمت ڀارتي ميڊيا ۾ 41 ڪروڙ 98 لک رپيا ٻڌائي وئي آهي.
