اسلام آباد(بيورو رپورٽ) صدر آصف علي زرداري چيو آهي ته پاڪستان ۽ بنگلاديش کي ويجهو آڻڻ لاءِ ڪم ڪرڻ جي ضرورت آهي. پي سي بي چيئرمين محسن نقوي پاران پاڪستان ۽ بنگلاديش ڪرڪيٽ ٽيمن جي اعزاز ۾ استقباليه ڏني وئي. ان موقعي تي پي سي بي چيئرمين محسن نقوي رانديگرن کي صدر آصف علي زرداري سان متعارف ڪرايو. صدر آصف علي زرداري چيو ته پاڪستان ڪرڪيٽ ٽيم تازي سيريز ۾ سٺي ڪارڪردگي ڏيکاري، ۽ بنگلاديش ڪرڪيٽ ٽيم پڻ اعليٰ معيار جو راند پيش ڪري رهي آهي. صدر، تاريخ جو حوالو ڏيندي چيو، “مان ان نسل سان تعلق رکان ٿو جنهن اسان کي الڳ ٿيندي ڏٺو. اڄ جي نسل جدائي جي درد کي سمجهي نٿي سگهي.” اسان کي ڪنهن نه ڪنهن طرح هن درد جو علاج ڪرڻو پوندو. آصف علي زرداري چيو ته بنگالي قوم خطي جي امير ترين قومن مان هڪ هئي. پاڪستان جي صدر چيو ته پاڪستان ۽ بنگلاديش کي ويجهو آڻڻ لاءِ ڪم ڪرڻ جي ضرورت آهي. اسان کي ٻنهي ملڪن جي عوام جي ڀلائي لاءِ ڪم ڪرڻو پوندو ۽ گڏجي اهڙا قدم کڻڻا پوندا جيڪي ٻنهي ملڪن جي عوام کي خوش ڪن. صدر چيو ته بنگلاديش دنيا ۾ هڪ ڪامياب ملڪ طور سڃاتو وڃي ٿو ۽ الله تعاليٰ بنگلاديش کي پاڪستان جهڙن وسيلن سان نوازيو آهي ۽ ٻنهي ملڪن جي وچ ۾ تعاون جا وسيع موقعا موجود آهن. آصف علي زرداري چيو ته ٻنهي ملڪن جي نوجوان نسل کي باهمي رابطي کي وڌائڻ جي ضرورت آهي، ۽ رانديون باهمي رابطي جو هڪ اهم ذريعو آهن. آصف زرداري مسڪرائيندي چيو ته توهان سياست ۾ نه اچجو سياست اسان تي ڇڏي ڏيو، سياست اسان کي ڪرڻ ڏيو، اسان جيلن به وڃي سگهون ٿا، اسان جهڙا ماڻهو 14 سال جيل ڪاٽي سگهن ٿا اوهان جهڙا ماڻهو نه.
