حيدرآباد (بيورو رپورٽ) حيدرآباد جو راڻي باغ اجڙي ويو آهي. راڻي باغ جي سار سنڀال نه ٿيڻ سبب گهوڙا ۽ گڏهه راڻي باغ جي پارڪن ۾ گاهه کائيندي ۽ ليٽندي نظر اچن ٿا. راڻي باغ ۾ يوگا ڪندڙ ماڻهن سوشل ميڊيا تي هڪ وڊيو اپلوڊ ڪئي آهي جنهن ۾ ڏسي سگهجي ٿو ته هڪ گهوڙو راڻي باغ جي پارڪ ۾ گاهه کائي رهيو آهي ته ٻيو گهوڙو وري پارڪ ۾ ليٽندي نظر اچي ٿو. يوگا ڪندڙ ماڻهن جو چوڻ آهي ته راڻي باغ ۾ 300 کان وڌيڪ ملازم رکيل آهي جن جو تعلق پيپلزپارٽي سان آهي، اهي ماڻهو ڪم نٿا ڪن جنهن ڪري اڪثر گهوڙا ۽ گڏهه راڻي باغ ۾ اندر اچي ان جا پارڪ تباهه ڪري وڃن ٿا. ماڻهن کان راڻي باغ جي انٽري في طور 50 رپيا وصولي ڪئي ويندي آهي پر راڻي باغ ۾ ڏسڻ جهڙي ڪا به شيءَ موجود ڪونهي جڏهن ته ان جا پارڪ ۽ چڙيا گهر تباهه ٿي ويا آهن. يوگا ڪندڙ ماڻهن اپيل ڪئي آهي ته راڻي باغ کي تباهي ۽ بربادي کان بچايو وڃي.
