حيدرآباد / مسو ڀرڳڙي(بيورو رپورٽ+ ن پ ا) حيدرآباد ۾ مبينا مقابلن ۾ 1 ڏوهاري مارجي ويو ۽ عورت سميت 4 ڄڻاگرفتار ڪيا ويا. ان ڏس ۾ حيدرآباد ڀرسان ٻڍاڻي جي علائقي ۾ پوليس سان مبينا مقابلي ۾ هڪ ڦورو مارجي ويو جڏهن ته سندس ساٿي فرار ٿي ويو. چيو پيو وڃي ته ٽن موٽرسائيڪلن تي سوار ڦورو فخري پمپ ويجهو ڦرلٽ ڪري رهيا هئا ته پوليس پهچي وئي جنهن سبب پوليس ۽ ڦورن وچ ۾ مقابلو ٿيو. مقابلي ۾ گوليون جي ڏي وٺ دوران هڪ ڦورو مارجي ويو جڏهن ته سندس ساٿي فرار ٿي ويا.ٻڍاڻي پوليس موجب مارجي ويل ڦورو جي شناخت سفير حسين ڳهيلو طور ٿي آهي جڏهن ته مارجي ويل ڦورو جو لاش ٻڍاڻي پوليس سول اسپتال حيدرآباد منتقل ڪري ورتو آهي، ڦورو وٽان هڪ پسٽل به هٿ آيو آهي. پوليس فرار ٿي ويل ڦورو جي گرفتاري لاءِ ناڪابندي ڪري ڇڏي آهي. مارجي ويل ڦورو جو لاش اسپتال منتقل ڪيو ويو آهي. هوڏانهن حيدرآباد جي حسين آباد پوليس هڪ مبينا مقابلي ۾ هڪ عورت سميت ٽن ڪار لفٽر جوابدارن کي گرفتار ڪري ورتو آهي. مقابلي ۾ هڪ جوابدار کي زخمي حالت ۾ گرفتار ڪرڻ ۽ جوابدارن وٽان چوري ٿيل ڪار ۽ هٿيار هٿ ڪرڻ جي به دعويٰ ڪئي وئي آهي. پوليس جو چوڻ آهي ته ڪار لفٽر حسين آباد جي علائقي ۾ موجود هئا جن جو پيڇو ڪيو ويو ته انهن فرار ٿيڻ جي ڪوشش ڪئي. ان دوران هٽڙي باءِ پاس جلسي گرائونڊ وٽ ڪار لفٽرن ۽ پوليس وچ ۾ مقابلو ٿيو. دوبدو فائرنگ جي نتيجي ۾ هڪ جوابدار ظهير مگسي زخمي ٿي پيو جڏهن ته ساڻس گڏ هڪ عورت صائما ۽ ٻئي جاوبدار ذيشان چنا کي به گرفتار ڪيو ويو. سندن هڪ ساٿي پوليس کان فرار ٿي ويو آهي. پوليس مطابق گرفتار جوابدار ڪارن جي چوري سميت اسٽريٽ ڪرائيم جي وارداتن ۾ ملوث هئا. جوابدارن وٽان موقعي تان هڪ ڪار هٿ آئي جيڪا هٽڙي ٿاڻي مان چوري ٿيل هئي. ان کانسواءِ هڪ ٻي ڪار به هٿ ڪئي وئي جيڪا حسين آباد ٿاڻي جي حد مان چوري ٿي هئي. جوابدار چوري ٿيل ڪار کي ٻئي هنڌ منتقل ڪرڻ جي ڪوشش ڪري رهيا هئا ته پوليس کي سندن چرپر جو پتو پيو جنهن تي انهن جو پيڇو ڪيو ويو ۽ بعد ۾ هٽڙي باءِ پاس وٽ جلسا گرائونڊ ڀرسان مقابلو ٿيو جنهن ۾ اهي گرفتاريون عمل ۾ آيون. جوابدارن وٽان هڪ پسٽل به هٿ ڪيو ويو آهي. سندن ڏوهاري رڪارڊ جي وڌيڪ جاچ ڪئي پئي وڃي.
