ڪراچي(اسٽاف رپورٽر) حيدرآباد واسي آن لائين ٽيڪسي ڊرائيور جو قاتل گرفتار، ان ڏس ۾ سچل پوليس دعويٰ ڪئي آهي ته ٽيڪنيڪل بنيادن تي ڪارروائي ڪري جوابدار عبدالصمد کي گرفتار ڪيو ويو آھي. پوليس موجب جوابدار عبدالصمد آن لائين ايپليڪيشن ذريعي ٽيڪسي ڪار بوڪ ڪرائي هئي، ڊرائيور شاهزيب انصاري جوابدار کي کڻي جيئن ئي پنجابي سوداگران سوسائٽي ۾ سميرا چوڪ پھتو ته عبدالصمد ڊرائيور تي پستول تاڻي ڪار سائيڊ ۾ بيهارڻ لاءِ چيو، شاهزيب جيئن ئي ڪار بيهاري ته جوابدار کيس ڪنڌ وٽ گولي هڻي ڇڏي، جوابدار مقتول ڊرائيور جو لاش اڇلائي ڪار ڪاهڻ جي ڪوشش ڪئي، ٽريڪر بند ٿيڻ سبب ڪار اتي ئي بيهي رهي. پوليس موجب واقعي واري جاءِ تان گڏ ڪيل شاهدين ۽ سي سي ٽي وي فوٽيج جي مدد سان جوابدار کي گرفتار ڪري پستول ۽ گوليون هٿ ڪري ورتيون واضح رهي ته مقتول شاهزيب انصاري حيدرآباد جو رهواسي هو.
