حيدرآباد جي واپاري کي اغوا ۽ قتل ڪندڙ ڌاڙيل ٽولي جو سربراهه مقابلي ۾مارجي ويو، ساٿي هاف فراءِ

حيدرآباد / ٽنڊو ڄام (رپورٽ :فيض کوسو/  اظهر لوچي) حيدرآباد مان انبن جي واپاري حسن ناصر نظاماڻي کي اغوا ڪري رتيديري ڀرسان ڊکڻ جي علائقي ۾ قتل ڪندڙ ڌاڙيلن جي گروهه جي سربراهه کي حيدرآباد پوليس مقابلي ۾ مارڻ ۽ سندس هڪ ساٿي کي گرفتار ڪرڻ جي دعويٰ ڪئي آهي. اهو مبينا مقابلو راهوڪي ٿاڻي جي حد ۾ ٿيو جنهن ۾ راهوڪي، اي سيڪشن ۽ هٽڙي پوليس حصو ورتو. چيو پيو وڃي ته 6 ڌاڙيل راهوڪي ٿاڻي جي حد ۾ موجود هئا. اطلاع تي پوليس پارٽي پهچي ڌاڙيلن سان مقابلو ڪيو جنهن ۾ واپاري حسن ناصر نظاماڻي کي اغوا ڪري قتل ڪندڙ ڌاڙيلن جي ٽولي جو سربراهه عبدالوهاب ويسر مارجي ويو جڏهن ته ساڻس گڏ عبدالقادر سيال کي پوليس گرفتار ڪري ورتو آهي. 4 ڌاڙيل پوليس کان فرار ٿي ويا. پوليس چيو آهي ته حسن ناصر نظاماڻي جي اغوا ۾ مارجي ويل ڌاڙيل عبدالوهاب ويسر جو مک ڪردار هو ۽ هن ئي حسن ناصر نظاماڻي تي گولي هلائي کيس ماري ڇڏيو هو. مارجي ويل ڌاڙيل عبدالوهاب ويسر رتيديري جي ڳوٺ چنگل ويسر جو رهواسي هو. هن جي خلاف قتل، قتل جي ارادي، ڀنگ لاءِ اغوا، غيرقانوني هٿيار رکڻ ۽ پوليس سان مقابلي جهڙا مختلف ڪيس داخل ٿيل آهن ۽ هو ٻن ڪيسن ۾ مفرور به هو. حيدرآباد پوليس سندس گرفتاري تي 50 لک رپين جي انعام لاءِ سنڌ حڪومت کي سفارش به ڪئي هئي. پوليس ذريعن جو چوڻ آهي ته عبدالوهاب ويسر لاڙڪاڻي جي عاقل ٿاڻي جي حد ۾ به هڪ ماڻهو کي اغوا ڪيو هو ۽ هن جي بازيابي لاءِ 22 لک رپيا ڀنگ ورتو هو. هن جو لاش سندس ماءُ ارباب خاتون وصول ڪيو. پوليس هٿان گرفتار ٿيل ڌاڙيل عبدالقادر سيال بابت پوليس ذريعن انڪشاف ڪيو آهي ته هو هڪ اڳوڻي صوبائي وزير جو گارڊ به رهي چڪو آهي. عبدالقادر سيال شهدادڪوٽ جي ڳوٺ بگو جو رهواسي ٻڌايو پيو وڃي. واضح رهي ته واپاري حسن ناصر نظاماڻي کي 11 آڪٽوبر تي راهوڪي ٿاڻي جي حد مان اغوا ڪيو ويو هو. حيدرآباد، شڪارپور، لاڙڪاڻو ۽ دادو پوليس 24 آڪٽوبر تي سندس بازيابي لاءِ رتيديري ڀرسان ڊکڻ جي علائقي ۾ آپريشن ڪيو ته ان دوران ڌاڙيلن کيس گولي هڻي ماري ڇڏيو هو ۽ کيس يرغمال بڻائيندڙ ڌاڙيل فرار ٿي ويا هئا. ان مقابلي ۾ هڪ ڌاڙيل کي مارڻ ۽ هڪ کي زخمي حالت ۾ گرفتار ڪرڻ جي دعويٰ ڪئي وئي هئي.