ڊيرا اسماعيل خان (م ڊ) خيبر پختونخوا جي گورنر فيصل ڪريم ڪنڊي چيو آهي ته صوبائي حڪومت جو فوڪس رڳو جلسن ۽ جلوسن تي آهي، قيدي ائين آزاد ناهن ٿيندا. ڊيرا اسماعيل خان ۾ صحافين سان ڳالهائيندي فيصل ڪريم ڪنڊي چيو ته ڪي پي جو ڳنڀير مسئلو لا اينڊ آرڊر آهي ۽ صوبائي حڪومت امن امان جي حوالي سان مڪمل طور ناڪام آهي، حڪومت جو فوڪس رڳو جلسن ۽ جلوسن تي آهي انهن جو خيال آهي ته ائين سندن باني آزاد ٿي پوندو، جلسن جلوسن سان قيدي آزاد ناهن ٿيندا. هن چيو ته ڪي پي جا وسيلا احتجاج ۽ جلسن ۾ استعمال ٿي رهيا آهن، صوبائي حڪومت جي ماتحت ادارن ۾ پگهارون نه پيون ڏنيون وڃن، دليلن سان وفاق کان پئسا گهرو، بدمعاشي سان صوبي کي ڪجهه نه ملندو.
