ڪوئيٽا/مستونگ/راولپنڊي(م ڊ) بلوچستان ۾ دهشتگردي، مچ ۾ فورسز تي حملي ۽ مستونگ ۾ فائرنگ، 7 اهلڪارن سميت 10 ڄڻا مارجي ويا. پاڪ فوج جي ترجمان اداري آءِ ايس پي آر موجب، ڀارتي سهولتڪار بلوچ لبريشن آرمي (بي ايل اي) جي دهشتگردن مچ واري علائقي ۾ سيڪيورٽي فورسز جي گاڏي کي آءِ اي ڊي ذريعي نشانو بڻايو. شهيد ٿيل اهلڪارن ۾ صوبيدار عمر فاروق، نائيڪ آصف خان، نائيڪ مشڪور علي، سپاهي طارق نواز، سپاهي واجد احمد فيض، سپاهي محمد عاصم ۽ سپاهي محمد ڪاشف خان شامل آهن. آءِ ايس پي آر جو چوڻ آهي ته دهشتگردي جي بزدلاڻي ۽ سنگين ڪارروائي جي ذميوارن کي انصاف جي ڪٽهڙي ۾ آندو ويندو. سيڪيورٽي فورسز قوم سان گڏجي بلوچستان جي امن، استحڪام ۽ ترقي کي نشانو بڻائڻ جي هر ڪوشش کي ناڪام بڻائڻ لاءِ پرعزم آهن. ترجمان جو وڌيڪ چوڻ هو ته پاڪستاني سرزمين تي سرگرم ڀارت ۽ سندس سهولتڪار دهشتگردن جا ناپاڪ ارادا ناڪام بڻايا ويندا. بهادر سيڪيورٽي فورسز، قانون لاڳو ڪندڙ ادارا ۽ غيرت مند قوم دشمنن جي هر سازش جو ڀرپور جواب ڏيندي، ليويز ذريعن موجب مستونگ جي علائقي هزار ۾ فائرنگ جو واقعو پيش آيو جنهن جي نتيجي ۾ هڪ عورت سميت 3 ماڻهو مارجي ويا. ليويز ذريعن موجب قتل واقعي کانپوءِ حملي آور فرار ٿي ويا، واقعي جي جاچ ڪئي پئي وڃي.
