سکر (بيورو رپورٽ) سکر ويجهو باگڙجي جي ڪچي ۾ جتوئي برادري جي ٻن ڌرين ۾ پراڻي زميني تڪرار تان جهيڙو، فائرنگ ۾ هڪ ڄڻو قتل، ڌرين ۾ ڇڪتاڻ، واقعي جو ڪيس داخل نه ٿيو، مليل ڄاڻ موجب باگڙجي ٿاڻي جي حد ڪچي واري علائقي ڳوٺ يعقوب جتوئي ۾ جتوئي برادري جي ٻن ڌرين ۾ پراڻي تڪرار تان جهيڙو ٿي پيو، جنهن ۾ فائرنگ جي نتيجي ۾ عبدالحق عرف بدلو جتوئي موقعي تي مارجي ويو، ٻنهي ڌرين ۾ هڪ ڪلاڪ تائين فائرنگ جو سلسلو جاري رهيو، جنهن ڪري علائقو نو گوايريا بڻجي ويو، بعد ۾ پوليس پهچي مقتول جو لاش باگڙجي اسپتال آندو، جتي ڊاڪٽر موجود نه هجڻ سبب لاش سول اسپتال سکر نيو ويو، جتان ضروري ڪارروائي بعد مڙهه وارثن حوالي ڪيو ويو، پوليس جو چوڻ آهي ته جتوئي برادري جي ٻن ڌرين ۾ ٻن سالن کان زمين جي مالڪيءَ تان تڪرار هلندڙ آهي، جنهن جي نتيجي ۾ ٻه ڄڻا قتل ٿي چڪا آهن، ڪالهه ٻئي ڌر جو بدلو جتوئي فائرنگ ۾ مارجي ويو، واقعي بعد علائقي ۾ ڇڪتاڻ وڌي وئي، جڏهن ته ڌريون مورچا بند ٿي ويون آهن، آخري اطلاعن تائين واقعي جو ڪيس داخل نه ٿي سگهيو هو ۽ نه ئي ڪا گرفتاري عمل ۾ اچي سگهي هئي.
