راولپنڊي (مانيٽرنگ ڊيسڪ) احتساب عدالت اڳوڻي وزيراعظم نواز شريف جي ملڪيت نيلام ڪرڻ جو حڪم ڏئي ڇڏيو آهي. نيب راولپنڊي نواز شريف جي ملڪيت کي نيلام ڪرڻ لاءِ احتساب عدالت ۾ درخواست داخل ڪئي هئي جيڪا عدالت پاران قبول ڪئي وئي، جڏهن ته توشه خانه ريفرنس ۾ اشتهاري هجڻ تي عدالت نواز شريف جي ملڪيت نيلام ڪرڻ جو حڪم ڏنو آهي. عدالتي حڪم موجب، جتي به نواز شريف جي ملڪيت آهي ۽ ان تي ڪو به اعتراض ناهي آيو ته لاڳاپيل صوبائي حڪومت ان کي نيلام ڪري سگهي ٿي. عدالت پنهنجي حڪم ۾ ڊي سي لاهور ۽ ڊي سي شيخوپوره کي نواز شريف جون زمينون وڪڻڻ جو حڪم ڏنو آهي ۽ ڊپٽي ڪمشنر لاهور ۽ شيخوپوره کي 60 ڏينهن اندر رپورٽ جمع ڪرائڻ ، ملڪيت نيلام ڪرڻ ۽ رقم کي قومي خزاني ۾ جمع ڪرائڻ جي هدايت ڪئي آهي. عدالتي حڪم ۾ چيو ويو ته نواز شريف جون گاڏيون به 30 ڏينهن اندر نيلام ڪيون وڃن ۽ گاڏيون ضبط ڪيون وڃن ۽ پوليس جي مدد سان وڪرو ڪيون وڃن. عدالت اي ٽي او لاهور ۽ اسلام آباد کي نواز شريف جون 3 گاڏيون ۽ 2 ٽريڪٽر وڪرو ڪرڻ ۽ انهن جي 8 بئنڪ اڪائونٽن ۾ رقم قومي خزاني ۾ جمع ڪرائڻ جو به حڪم ڏنو. ياد رهي ته مريم نواز مري ۽ ڇانگا گلي گهر کي ضبط ڪرڻ تي اعتراض ڪيو آهي.
