ڪراچي (رپورٽ : نظير ميمڻ ) ملير ۾ بيدردي سان قتل ٿيل ارشاد رانجهاڻي ڪيس جو چئن سالن کانپوءِ فيصلو، مک جوابدار رحيم شاهه کي 6 سال قيد ۽ هڪ لک ڏنڊ ، ڪالهه دھشتگردي ٽوڙ عدالت جي جج صدف مدثر شهيد ارشاد رانجھاڻي قتل ڪيس جو محفوظ ڪيل فيصلو ٻڌائي ڇڏيو، عدالت مک جوابدار رحيم شاھ کي 6 سال قيد ۽ ھڪ لک رپيا ڏنڊ جي سزا ٻڌائيندي ٻين 2 جوابدارن کي ڏوهه ثابت نه ٿيڻ تي بري ڪري ڇڏيو، ڪيس جو مک جوابدار رحيم شاھه هن وقت عدالتي ريمانڊ تي جيل ۾ آھي، جڏهن ته ڪيس ۾ نامزد ڊي ايس پي شوڪت شاھاڻي ۽ سب انسپيڪٽر عامر رياض ضمانت تي آزاد ٿيل ۽ 2 جوابدار پوليس اهلڪار مفرور آهن، جن خلاف دهشتگردي ٽوڙ عدالت ۾ قتل جو ڪيس هلندو رهندو، شاھ لطيف ٿاڻي تي 6 فيبروري 2019ع تي واقعي جو ڪيس داخل ڪيو ويو ھو، جنهن ۾ دھشتگردي جا قلم شامل ڪيا ويا هئا، واضح رهي ته دھشتگردي ٽوڙ عدالت دليل مڪمل ٿيڻ بعد 26 آگسٽ 2023 تي فيصلو محفوظ ڪيو ھو، جيڪو 3 دفعا ملتوي ڪيو ويو، پوليس موجب رحيم شاھ فيبروري 2019ع ۾ شاهه لطيف ٽائون ۾ فائرنگ ڪري ارشاد رانجھاڻي کي قتل ڪيو هو. هوڏانهن ارشاد رانجهاڻي جي وڪيل محمد خان شيخ ٻڌايو ته رحيم شاهه جي پوڻا 5 سال ڪاٽيل قيد ۽ معافين کي گڏائي سندس 6 سال قيد کي ختم ڪري ڪراچي سينٽرل جيل مان آزاد ڪيو ويو آهي
